Sigur gegn Haukum

Pepsídeildar-lið Hauka laut í lægra haldi fyrir ÍA í deildarbikarnum í dag.  Lokatölur 4-3, sem ekki gefa endilega rétta mynd af gangi leiksins - sem gengur þó út á að það lið vinnur sem skorar fleiri mörk.  Í hálfleik var staðan 2-2.

Leikurinn var rétt hafinn þegar Ragnar Leósson vippaði boltanum laglega á u.þ.b. 25 metra færi yfir markvörðinn og staðan 1-0.  Eftir það voru það þó Haukarnir sem réðu ferðinni.  Þeir jöfnuðu svo leikinn á 20. mínútu með glæsilegu skoti.  Þrátt fyrir að Haukarnir réðu nokkuð ferð leiksins náðu Skagamenn ágætri sókn á 38. mínútu  - Ragnar Leósson bjó til úrvals sókn sem að Ívar Haukur Sævarsson rak endahnútinn á og setti boltann í netið.  Haukarnir jöfnuðu svo upp úr aukaspyrnu til hliðar við vítateiginn, þá renndi Arnar Gunnlaugsson boltanum á samherja sinn sem fékk næði til að smella tuðrunni í netið.  Jafnt í hálfleik þar sem Pepsi-deildar lið Hauk var sterkari aðilinn.

Í seinni hálfleik mættu Skagamenn heldur sprækari.  Á fyrstu 10 mínútunum fengu þeir tvö ágætis marktækifæri, en það var ekki fyrr en á 62. mínútu sem Ragnar Leósson bætti við þriðja marki liðsins og á þeirri 70. bætti Arnar Már við fjórða markinu, eftir frábæra sókn Skagamanna.  Eftir það sóttu Haukarnir  í sig veðrið án þess þó að skapa sér nein veruleg marktækifæri en leikur liðsins varð heldur fábrotinn efitr að Arnar Gunnlaugsson fór út af í hálfleik.  Þeir fengu hins vegar gott færi á 85. mínútu og þriðja mark Haukanna leit dagsins ljós.  Eftri eilítinn atgang Hafnfirðinganna á síðustu mínútunum rann leikurinn út í sandinn með sigri Skagamanna 4-3.

Ragnar Leósson og Arnar Már voru manna frískastur í Skagaliðinu, en þeir Andri geir og Ísleifur skiluðu sínu í miðju varnarinnar. Páll Gísli verður ekki sakaður um mörkin og þeir Óli Valur og Ívar voru líflegir á köflum. Ánægjulegt var hins vegar að sjá að Skagamenn höfðu talsverða breidd umfram Pepsídeildarliðið og þeir leikmenn sem komu inn á gáfu ekki tommu eftir.  En sem sagt - ágætur sigur og jafnframt 7. sigur Skagamanna í jafn mörgum leikjum það sem af er ári!

Í gær - föstudag lék B-lið ÍA við Tindastól og tapaði 1-2. Það var Andri Júlíusson sem skoraði mark Skagamanna úr vítaspyrnu.

Liðið:

                                Páll Gísli

          Aron  Andri Geir       Ísleifur    Guðjón

          Arnar Már Igor (Einar Logi)    Ragnar Leóss.

          Ívar (Andri A.) Fannar Freyr (Ragnar G.)  Óli Valur (Emil S.) 

Meiðslalistinn:

Guðmundur Böðvar - ristarbrotinn

Heimir Einarsson - bakmeiðsl

Arnþór Ingi - ökkli

Árni Thor- hnémeiðsl

Sölvi G. hnémeiðsl

Gísli Freyr hnémeiðsl

Leikbann:

Andri Júlíusson